Stefán Jóhann Stefánsson                   

 

Eldri forsíðupistlar

Greinar:

Hér eru birtar nokkrar greinar sem birtar hafa verið í dagblöðum og á vefjum.


Tökum þátt í opnu prófkjöri (Í Morgunblaðinu 11.2.2006)

Í dag og á morgun gefst Reykvíkingum kostur á að taka þátt í opnu prófkjöri Samfylkingarinnar og hafa þannig áhrif á það hverjir skipa framboðslista flokksins við borgarstjórnarkosningarnar í vor. Frambjóðendur hafa síðustu daga og vikur kynnt sig, verk sín og skoðanir. Ég hef lagt áherslu á reynslu mína sem varaborgarfulltrúi og formaður og fulltrúi í nefndum og stjórnum á sviði velferðar, umhverfis, jafnréttis og rekstrar. Þá hef ég lagt áherslu á sjónarmið mín um velferð fyrir alla, jafnrétti, umhverfisvernd, gott atvinnulíf og heilbrigðan rekstur borgarinnar.

Ég hef lagt áherslu á að það þurfi að efla starfið í leikskólum og hverfisskólum borgarinnar því það er börnunum og framtíð borgarinnar fyrir bestu, og að auðvelda þurfi enn frekar íþrótta- og listiðkun barna. Ég hef lagt áherslu á að eyða þurfi kynbundnum launamun og auka jafnrétti kynjanna, og að brýnt sé að koma á mannréttindastefnu sem taki til ólíkra hópa og í raun allra íbúa. Ég hef lagt áherslu á að við þurfum að virða þarfir aldraðra, hefja sem fyrst byggingu nýs hjúkrunarheimilis og bæta þjónustu við aldraða sem búa heima. Þá hef ég lagt á það áherslu að við förum vel með það fé, landrými og umhverfi sem okkur er trúað fyrir.

Ég hef ritað um þetta margar blaðagreinar, einkum hér í Morgunblaðinu, auk þess sem ég hef rætt þessi mál í útvarps- og sjónvarpsþáttum. Þá er allt þetta efni meira og minna á þeim vef sem ég hef komið mér upp í tengslum við þetta prófkjör. Slóðin er www.stefanjohann.is og þar er hægt að kynna sér þessi mál. Ég hvet Reykvíkinga til að taka þátt í prófkjöri Samfylkingarinnar og ég hvet þá einnig til að setja mig í þriðja sætið á listanum, eða því sem næst.

Öldrunarþjónustu þarf að bæta (Í Morgunblaðinu 10.2.2006)
Góð þjónusta við aldraða er einn af hornsteinum hvers velferðarsamfélags. Hér í Reykjavík er veitt margs konar þjónusta við aldraða, en það er ýmislegt sem má bæta. Einna brýnast er að flýta því sem kostur er að taka í notkun ný hjúkrunarrými til að leysa vanda þeirra sem eru í brýnni þörf fyrir slíkt. Það þarf líka að fylgja eftir samþættingu á heimahjúkrun og félagslegri heimaþjónustu til að gera þeim sem það vilja kleift að búa lengur heima.

Aldraðir geta nýtt sér ýmsa þjónustu á vegum borgarinnar. Það er boðið upp á félagsstarf og heimsendingu á mat, aðstoð við heimilishald, auk almennrar félagsþjónustu af ýmsu tagi. Þessi þjónusta léttir undir með fólki og á að auka á öryggi og öryggistilfinningu. Velferðarráð hefur ákveðið að grípa til aðgerða til að mæta þörfum þeirra eldri borgara sem búa við einangrun. Þá höfum við í velferðarráði lagt áherslu á gott samstarf við aldraða og gert sérstakan þjónustusamning við Félag eldri borgara til að betur sé hægt að sinna tiltekinni þjónustu við þennan hóp. Allt þetta skiptir máli, en þó verður ekki framhjá því litið að það þarf að skoða heildstætt þennan málaflokk og jafnvel færa stærri hluta hans frá ríkinu til borgarinnar.

Það hefur talsverða ókosti í för með sér að yfirstjórn öldrunarmála sé ekki á einni hendi. Það er ekki hægt að koma upp nýju hjúkrunarheimili sem þörf er á í Reykjavík án þess að samþykki heilbrigðisráðuneytis komi til. Það hefur verið stefnan að fjölga hjúkrunarheimilum í Reykjavík og nú hillir undir að sú stefna verði að veruleika með smíði hjúkrunarheimilis með 110 rýmum í Sogamýri. Annað er í bígerð í Vesturbænum.

Smíðin sjálf leysir þó ekki allan vanda, því það þarf að koma til rekstrarfé. Það kemur lögum samkvæmt úr ríkissjóði, og rekstrarframlög hafa verið það knöpp að flest hjúkrunarheimili hafa búið við mjög þröngan kost og jafnvel safnað skuldum. Rekstrarvandi hjúkrunarheimilanna hefur sett mark á starfsemi þeirra. Það er oft ekkert svigrúm til þess að bæta starfsemina og starfsmönnum er skorinn þröngur stakkur í mörgum skilningi. Lág laun eru áhyggjuefni og starfsmannavelta er oft meiri en æskileg er í svo viðkvæmri þjónustu. Úr þessu verður að bæta með sameinuðu átaki opinberra aðila og fleiri aðila.

Ég hef trú á því að með þeim byggingum sem hafa verið ákveðnar eða eru í bígerð muni aðstæður batna verulega að þessu leyti. Það þarf þó að halda áfram að þróa þjónustu í þessum málaflokki. Þar er mikilvægt að haft sé samráð við samtök aldraðra og að sjónarmið þeirra séu virt í þessum efnum, hvort sem um einstaklinga eða samtök er að ræða. Það er ekki það sama sem hentar öllum og þess vegna þarf þjónustan að vera með fjölbreyttu sniði.

Stefán Jóhann Stefánsson, situr í stjórn hjúkrunarheimilis í borginni og býður sig fram í 3. sæti í prófkjöri Samfylkingarinnar í Reykjavík.

Velferð og lífsgæði (Í Morgunblaðinu 8.2.2006)
Prófkjör Samfylkingarinnar í Reykjavík fer fram um næstu helgi. Þar gefst Samfylkingarfólki og öðrum borgarbúum kostur á að velja borgarstjóraefni flokksins og aðra frambjóðendur á lista fyrir komandi borgarstjórnarkosningar. Ég býð mig fram í þriðja sætið í þessu prófkjöri.
Ég hef verið varaborgarfulltrúi á þessu kjörtímabili og setið í tveimur nefndum sem stýra mikilvægum málaflokkum, nefnilega velferðarráði og umhverfisráði. Þá sit ég í stjórn hjúkrunarheimilisins Skógarbæjar, hef verið í jafnréttisnefnd og var formaður stjórnar Innkaupastofnunar Reykjavíkurborgar þar til skipulagi hennar var breytt og var einnig formaður stjórnar Vélamiðstöðvar ehf. þar til hún var seld.
 

Samfylkingin sækir á (Í Morgunblaðinu 31.1.2006)

Nú er framundan spennandi tími í borginni. Hið pólitíska landslag er breytt. Það verður eftir sem áður tekist á um meginsjónarmið. Sjálfstæðisflokkurinn hefur lagt áherslu hlutverk einkaaðila og minni umsvif hins opinbera. Samfylkingin leggur hins vegar áherslu á að velferð og lífsgæði verði ekki tryggð nema til komi virkt framtak samfélagsins sem miði bæði að því að efla þann þrótt og mátt sem í borginni býr og jafna kjör með því að bjóða þeim aðstoð sem á þurfa að halda. Á þessu hefur oft verið talsverður munur í málflutningi sjálfstæðismanna í borgarstjórn og annarra. Samfylkingin viðurkennir hlutverk einkaframtaksins, enda leggur hún áherslu á frelsi til athafna og framtak einstaklinga. En það er ýmis þjónusta sem við viljum veita sem einkaaðilar og markaðir eru ekki færir um að annast svo að vel sé út frá sjónarmiðum jafnréttis og þess réttlætis sem við viljum viðhafa.
Þetta á við um ýmislegt sem flokkað er undir félags-, heilbrigðis- og menntamál.

Skólamál
Þannig er það réttlætismál að hverfisskólar séu helstu menntastoðir grunnskólabarna. Ýmis félagasamtök sem reka skóla og leikskóla auka á fjölbreytni, en við getum aldrei byggt aðeins á þeim og aðeins upp að vissu marki. Þess vegna hef ég lagt áherslu á að við eigum að efla framsækið skólakerfi frá leikskólum til háskóla, því gott og fjölbreytt skólastarf jafnar stöðu barna og ungmenna í lífinu. Sá grunnur sem lagður er í lífi barna skiptir verulegu máli. Utan fjölskyldunnar skipta leikskólar og grunnskólar höfuðmáli.

Hér í borginni er unnið mjög faglegt og gott starf á mörgum sviðum í skólakerfinu. Það þurfum við að styrkja þannig að það verði hægt að koma til móts við nemendur með ólíkar þarfir. Samfylkingin hefur miklu hlutverki að gegna í borgarmálunum. Fyrir dyrum stendur að velja fólk á lista í prófkjöri fyrir komandi borgarstjórnarkosningar. Það er vösk sveit einstaklinga með fjölbreytilegan bakgrunn sem gefur kost á sér. Ég býð mig fram í þriðja sætið.
 

Jafnrétti (á vef Samfylkingarfélagsins)
Jafnrétti og réttlæti eru lykilatriði í stefnu Samfylkingarinnar. Viðamesta jafnréttisverkefnið er enn sem fyrr að tryggja jafnan rétt og jafna stöðu kynjanna. En það þarf jafnframt að vinna að því í miklu meiri mæli en áður að bæta stöðu ýmissa hópa, svo sem fatlaðra, fólks af erlendum uppruna, samkynhneigðra og aldraðra. Reykjavíkurborg má ekki mismuna neinum, heldur verður hún að vinna að jafnri stöðu allra án tillits til uppruna, kynferðis eða mismunandi uppleggs fólks að öðru leyti. Allir eiga að hafa sömu mannréttindi.
     Leggja þarf aukna áherslu á jafnréttismál kynjanna á öllum sviðum og í öllum stofnunum og fyrirtækjum borgarinnar. Eitt brýnasta verkefnið til að byrja með er að tryggja launajafnrétti í reynd.
     Fólk af erlendum uppruna hefur auðgað íslenskt samfélag, enda hafa fyrirtæki og stofnanir kallað eftir fólki til starfa erlendis frá. Það er þó ekki hægt að líta á þetta fólk eingöngu sem vinnuafl. Það þarf að efla íslenskukennslu fyrir þennan hóp. Gjöld fyrir málanámið mega ekki verða að hindrun í þessu efni. Koma þarf í veg fyrir að hópar af erlendu bergi einangrist og að spenna skapist á milli ýmissa hópa vegna skilningsleysis og samskiptaörðugleika. Þess vegna þarf að auðvelda samskiptin og tungumálið er besta samskiptatækið.
     Vinna þarf að því að bæta stöðu samkynhneigðra í samfélaginu. Þar er eitt brýnasta verkefnið að draga úr fordómum og á því þarf að byrja strax í grunnskólum. Þetta er spurning um mannréttindi.
     Það þarf að vinna betur að því að tryggja fötluðum jafnan rétt á við aðra í samfélaginu. Í sumum efnum þyrftu sveitarfélögin á höfuðborgarsvæðinu að taka sig saman um að veita þjónustu við þennan hóp, t.d. er varðar ferðaþjónustu, sem er hvað þróuðust í Reykjavík. Það hlýtur hins vegar að vera sóun þegar senda þarf nokkra sérútbúna bíla í stað eins bíls til nokkurra einstaklinga á sama stað sem nýta sér þjónustu innan borgarinnar, bara vegna þess að þessir einstaklingar eiga ekki lögheimili í sama sveitarfélaginu.
     Yngstu og elstu aldurshóparnir þurfa eðlilega að jafnaði meiri þjónustu en aðrir. Öldrunarþjónusta er mjög aðþrengd á Íslandi í dag. Það á ekki hvað síst við um hjúkrunarheimili sem fá rekstrarframlag frá ríkinu sem í fæstum tilfellum dugar til að standa fyllilega undir þeirri þjónustu sem til er ætlast. Enn er hér skortur á hjúkrunarrýmum, en nú hefur verið gert samkomulag um byggingu hjúkrunarheimilis í austurbæ Reykjavíkur með 110 rýmum, auk þess sem stefnt er að smíði hjúkrunarheimilis í vesturbænum. En jafnframt hefur verið unnið markvisst að því að finna lausnir fyrir þann hóp aldraðra og sjúkra sem kýs að búa heima.
     Jafnréttisbaráttan hefur því á sér margar hliðar. Sem fyrr er eitt viðamesta verkefnið að jafna stöðu kynjanna, en jafnréttisbaráttan þarf einnig að ná til annarra hópa sem hér er fjallað um. (Efst á síðu)
 

Loftgæði í Reykjavík (í Morgunblaði 23.1.2006)
Í síðasta mánuði óskaði ég eftir því á fundi umhverfisráðs Reykjavíkur að lögð yrðu fram gögn um loftgæði í borginni í kjölfar þess að svifryk í andrúmslofti borgarbúa hafði í nokkrum tilfellum farið yfir mörk sem sett eru með hliðsjón af heilsufarsmarkmiðum. Það þarf að bregðast við og draga úr svifryki til að koma í veg fyrir hugsanlegt heilsutjón og eins þar sem verið er að herða viðmiðanir í þessum efnum í Evrópu.
     Stærsti hluti svifryks í Reykjavík stafar frá umferð, og þar af er mestur hluti að vetri til vegna malbiksagna sem nagladekk rífa upp. Það er mat starfsmanna borgarinnar að tíu þúsund tonn af malbiki séu rifin upp árlega og að kostnaður vegna þess sé á bilinu 100-200 milljónir króna.
     Framkvæmdasvið borgarinnar hefur þegar gripið til þess ráðs að þrífa betur götur í þeirri von að það megi draga úr svifryksmengun. Vinnuhópur um notkun nagladekkja, sem skilaði skýrslu nú eftir áramótin, greinir frá því að reynsla erlendis frá bendi til þess að hægt sé að minnka verulega notkun nagladekkja án þess að draga úr umferðaröryggi. Vinnuhópurinn leggur til að víðtækt samráð verði haft við lögreglu, Vegagerð, önnur sveitarfélög, Umferðarráð og Félag íslenskra bifreiðaeigenda um næstu skref í þessum málum. Það þurfi að upplýsa vel um allar hliðar málsins. Nefndar eru hugsanlegar leiðir til að draga úr óæskilegum afleiðingum af notkun nagladekkja. Þar á meðal er að hámarkshraði verði lækkaður tímabundið við þær aðstæður þegar svifryk getur orðið mikið, að litið verði á kostnaðarþætti málsins, að hvatt verið til vistvæns aksturs og að almenningssamgöngur verði bættar. Hvað síðasttalda atriðið varðar þá vill umhverfisráð borgarinnar láta kanna kosti þess að hafa gjaldfrjálst í strætó fyrir vissa hópa á tilteknum tímum.
     Það þarf að vinna markvisst í þessum málum og nýta þá þekkingu sem við teljum besta og hafa heildarhagsmuni allra borgarbúa að leiðarljósi. (Efst á síðu)

Íþróttir og listir fyrir öll börn (birt í Mbl. 10. janúar 2006)
Íþrótta- og æskulýðsmál hafa verið í góðum farvegi í borginni, en betur má ef duga skal. Þótt við eigum marga frábæra íþróttamenn og listamenn eru of mörg börn sem hætta íþróttaiðkun, listnámi eða annarri skipulegri tómstundastarfsemi of snemma. (meira)

Eflum velferðina og jöfnum kjörin! (Birt í Fréttablaðinu 6.1.2005)
Nýlegar upplýsingar um ofurlaun stjórnenda fyrirtækja og stofnana vekja furðu margra. Víst er að velferð flestra stjórnenda er í góðu lagi, en fjölmargir aðrir hafa litlar tekjur og þurfa að reiða sig á aðstoð hins opinbera til þess að geta lifað sómasamlegu lífi. Í þeim hópi er fjöldi barna og aldraðra. Til að efla hina almennu velferð er mest um vert að bæta kjör þessa hóps. (meira)

Siðbót sjálfstæðismanns?  (Fréttablaðið birti þetta 9.12.2005)
Frambjóðandi í prófkjöri Sjálfstæðisflokksins í Reykjavík á dögunum lýsti því yfir að hann sæktist ekki eftir fjárstuðningi frá byggingaverktökum og gaf þar með í skyn að það gæti verið varasamt fyrir stjórnmálamann að taka við fé úr byggingabransanum. Það væri hins vegar í lagi að þiggja fé frá öðrum. Af þessu tilefni er eðlilegt að fólk velti því fyrir sér hvað liggi að baki þegar aðrir frambjóðendur Sjálfstæðisflokksins, þ.e. þeir sem ekki höfðu þennan fyrirvara á styrk frá byggingaverktökum,  lýsa yfir skoðunum í skipulags- og byggingarmálum. (meira)

Breiðholtið er gott og batnar enn (Breiðholtsblaðið 9.12.05)
Hverfafélag Samfylkingarinnar í Breiðholti hélt aðalfund í Gerðubergi 30. nóvember sl., en félagið hefur verið starfandi frá sumri 2003. Á aðalfundinum mættu m.a. borgarstjórinn í Reykjavík, Stefán Jón Hafstein borgarfulltrúi og Mörður Árnason alþingismaður. Fundarmenn vildu margir fylgja fastar eftir hraðatakmörkunum í hverfinu, bæta almenningssamgöngur og kjör kennara, svo nokkuð sé nefnt. (meira)

Samfylkingunni vex ásmegin (5.12.2005) (Fréttablaðið birti þetta 6.12.2005)
Það hefur verið dálítið forvitnilegt að fylgjast með umfjöllun sumra fjölmiðla og andstæðinga Samfylkingarinnar um stöðu flokksins. (meira)

Vitundarvakning í umhverfismálum? (Fréttablaðið 1.12.05)
Líklega hafa ýmsir vaknað til vitundar um mengandi áhrif umferðar á höfuðborgarsvæðinu í síðustu viku. Í fréttum var frá því sagt að magn tiltekinna efna hefði verið meira en góðu hófi gegndi og að á slíkum þurrum og köldum vetrardögum færi mengun frá útblæstri bifreiða og svifryk frá umferð yfir hámörk sem sett eru til verndar heilsu manna. Síðan fór að blása, en vindurinn blæs þessu að mestu á haf út - og lengi tekur víst sjórinn við. (Lesa meira)

Jöfnum leikinn enn frekar (á vef SFFR 14.10.05)
Svo virðist í þeirri umræðu sem nú á sér stað í aðdraganda borgarstjórnarkosninga að ýmsir vilji gera skipulagsmál að aðal kosningamálinu. Menntamál eru einnig nefnd, einkum menntun yngstu barnanna, leikskólabarnanna. Það fer minna fyrir því að álitsgjafar vilji taka hin almennu velferðarmál inn á sitt umræðuborð.(Lesa meira)

Hófleg gjöld á fyrirtæki í Reykjavík
Mikilvægt er að þess sé gætt að gjöld hins opinbera fyrir þjónustu við fyrirtæki og einstaklinga séu hófleg og í samræmi við lýðræðislega mótaða stefnu. Þetta á að sjálfsögðu við um gjöld sem sveitarfélög innheimta hjá fyrirtækjum vegna mengunar- og heilbrigðiseftirlits.  (Sjá nánar - greinin birtist í Fréttablaðinu í september 2005).

Samfylkingin á leikinn
Nú er ljóst að Reykjavíkurlistinn býður ekki fram með sama hætti og gert hefur verið í þrennum undangengnum kosningum. (Sjá nánar) - Greinin birtist í Fréttablaðinu í september 2005 og jafnframt á vef Samfylkingarinnar) 

Hjólað í vinnuna, grein í Morgunblaðinu 28.5.2005.
Velferðarþjónusta í Reykjavík, grein í Morgunblaðinu 19.3.2005.
Staða forsjárlausra foreldra könnuð, grein í Fréttablaði í júlí 2005.
Ástæður verðhækkunar húsnæðis að undanförnu, Morgunblað 1. apríl 2005.
Velferðarþjónusta í Reykjavík, Morgunblað 19. mars 2005.

Áfengisveitingar í íþróttahúsum?, Morgunblað 19. apríl 2004.

Samábyrgð í heilbrigðismálum, Morgunblað 2. desember 2003.
Nýskipan innkaupamála í Reykjavík, Morgunblaðið 30. ágúst 2003

Árangursríkt átak hjá Félagsþjónustunni, Morgunblaðið 7. desember 2002
Velferðarborgin Reykjavík, Morgunblaðið 22. maí 2002
Öflugt íþróttastarf, Morgunblaðið 14. maí 2002
Frábærir leikskólar, Morgunblaðið 11. maí 2002
Til hvers allt þetta at?, Morgunblaðið 16. febrúar 2002
Aukin og bætt þjónusta, Morgunblaðið 12. febrúar 2002

Frétt í Morgunblaðinu 8. maí 2004 um afstöðu til áfengisveitinga í íþróttahúsum.
Frétt í Morgunblaðinu 2. apríl 2004 um átök um áfengisveitingar í íþróttahúsum.
Afstaða til eignameiri og eignaminni - frétt í Morgunblaði af borgarstjórnarfundi í janúar 2004
Stefán í 9. sæti Reykjavíkurlistans - grein í Morbunglaði 12. febrúar 2002

Eldri greinar eftir mig er m.a. hægt að finna í gagnasafni á vef Morgunblaðsins.